’’چند ماہ میں پاکستان میں سعودی سرمایہ کاری کی طرف پیش رفت ہوگی‘‘

سعودی وزیرخارجہ نے کہا ہے کہ چند ماہ میں پاکستان میں سعودی سرمایہ کاری کی طرف پیش رفت ہوگی۔

اسلام آباد میں پاکستان اور سعودی عرب کے وزرائے خارجہ نے مشترکہ نیوزکانفرنس کی۔ وزیرخارجہ اسحاق ڈارنے کہا کہ سعودی عرب کو باضابطہ طور پرایس آئی ایف سی سے آگاہ کیا گیا ہے۔ سعودی وفد کو زراعت، کان کنی اور توانائی کے شعبے میں مواقع سے آگاہ کیا۔

وزیرخارجہ اسحاق ڈار نے کہا کہ ایس آئی ایف سی پلیٹ فارم کے ذریعے پاکستان میں سرمایہ کاری بڑھانا چاہتے ہیں۔ پاکستان سعودی سرمایہ کاروں کو مکمل تحفظ فراہم کرے گا۔ آئی ٹی، معدنیات، زراعت، انفراسٹرکچر، سمیت دوسرے شعبوں میں سرمایہ کاری پر بات ہوئی۔

سعودی وزیر خارجہ شہزادہ فیصل بن فرحان نے کہا کہ چند ماہ میں پاکستان میں سعودی سرمایہ کاری کی طرف پیش رفت ہوگی۔ غزہ میں فلسطینی بھوک سے مررہے ہیں، غزہ میں فوری طور پرجنگ بندی ہونی چاہیے۔ خطے میں تنازع کو مزید نہیں بڑھنا چاہیے۔

شہزادہ فیصل بن فرحان نے کہا کہ جنگ بندی کے لیے عالمی برادری کو اپنا کردار ادا کرنا چاہیے، غزہ کی صورتِ حال پردنیا کا دہرا معیارسب کے سامنے ہے۔ غزہ میں 35ہزارسے زائدفلسطینی شہید ہوئے۔ دنیا غزہ میں جنگ بندی کی ذمے داری پوری نہیں کررہی۔

Advertisement

اس موقع پروزیرخارجہ اسحاق ڈار نے کہا کہ فلسطینیوں کی نسل کشی کو روکا جائے۔ اس پر تحقیقات ہونی چاہیے۔ پاکستان کو مشرقِ وسطٰی کی صورت حال پربہت تشویش ہے۔ دنیا کو اب جاگ جانا چاہیے۔

سعودی وزیرخارجہ نے کہا کہ پاکستان کا دورہ انتہائی مثبت رہا، ایس آئی ایف سی میں سرمایہ کاری میں سنجیدگی نظر آئی، سرمایہ کاری کے حوالے سے ہم سے جو ہوگا ہم کریں گے۔ اس موقع پر وزیرخارجہ اسحاق ڈار نے کہا کہ 25 لاکھ پاکستانیوں کی میزبانی پرسعودی عرب کے مشکور ہیں۔