آج لانڈھی میں دہشتگردی کا ناخوشگوار واقعہ پیش آیا، بلاول بھٹو

پاکستان پیپلز پارٹی کے چیئرمین بلاول بھٹو زرداری کا کہنا ہےکہ آج لانڈھی میں دہشت گردی کا ناخوشگوار واقع پیش آیا، پولیس جوانوں نے قربانی کی عمدہ مثال قائم کی۔

بلاول بھٹو نے میڈیا سے گفتگو کرتے ہوئے کہاکہ افسوس کی بات ہے دہشتگرد ایک بات پھر سر اٹھا رہے ہیں، وفاقی اور صوبائی حکومتوں کو اس پر ہنگامی اقدامات لینا ہوں گے۔

انہوں نے کہاکہ مفاہمت کے حوالے سے صدر مملکت نے واضح پیغام دیا ہے، تالی دو ہاتھوں سے بجتی ہے، پی ٹی آئی کے اقدامات سے قومی مفاہمت کو جھٹکا پہنچا۔

چیئرمین پی پی نے کہاکہ پاکستان پیپلز پارٹی نے جو منشور پیش کیا اس پر وزیراعظم پاکستان نے بھی اپنی تقریر پر زور دیا، امید ہے حکومت بے نظیر انکم سپورٹ پروگرام کو آگے بڑھائے گی۔

بلاول بھٹو نے کہاکہ پی ٹی آئی پہلے ایسے بیانات دلواتی ہے پھر جب اس پر ردعمل آتا ہے تو وہ بیان واپس لیتی ہے، پی ٹی آئی کے ایک رہنما نے سعودی وزیر خارجہ کے دورے کے دوران انتہائی نامناسب بیان دیا ، ہم اس بیان کی شدید مزمت کرتے ہیں، اس طرح کی سیاست نہیں چلتی، اپوزیشن والے آصفہ بھٹو ایک اکیلی لڑکی سے ڈرتے ہیں۔

ان کا کہنا تھا کہ مولانا فضل الرحمان کو احتجاج کے حوالے سے مکمل سہولت فراہم کریں گے، مولانا کا احتجاج حقیقت پر مبنی ہونا چاہیے ،انہیں غلط گائیڈ کیا جارہا ہے۔

چئیرمین پی پی نے کہاکہ مولانا فضل الرحمان کو تحقیقات کروانی چاہیں کہ کیا جو انہیں بتایا جارہا ہے وہ سچ ہے کہ نہیں ، مولانا فضل الرحمان کا احتجاج ڈیرہ اسماعیل خان میں بنتا ہے، اس قسم کی سیاست سمجھ سے باہر ہے۔