ترک بری افواج کے کمانڈر کو نشان امتیاز ملٹری کے اعزاز سے نوازا گیا ہے۔ (ٹی إین إے)

تفصیلات کےمطابق ترک بری افواج کے کمانڈر کو صدرمملکت آصف زرداری نے اسلام آباد میں ایک خصوصی تقریب میں نشان امتیاز ملٹری دیا۔

صدر نے ایوارڈ پاکستان اور ترکیہ کے درمیان دفاعی تعلقات مضبوط بنانے کےاعتراف میں دیا۔

صدرمملکت آصف علی زرداری سے ترک بری افواج کے کمانڈر کی ملاقات ہوئی اس ملاقات میں آرمی چیف جنرل عاصم منیر نے بھی شرکت کی۔

ملاقات میں دونوں برادر ممالک کے درمیان دفاعی تعاون سے متعلق امور پرتبادلہ خیال ہوا اور دونوں ممالک کا باہمی مفاد میں دوطرفہ تعلقات مزید وسعت دینے کی ضرورت پر زور دیا گیا۔

ملاقات کے موقع پر صدر آصف علی زرداری نے کہا کہ پاکستان ترکیہ کے ساتھ اپنے تعلقات پر فخرکرتا ہے، ترکیہ نے ہمیشہ بنیادی مسائل پر پاکستان کی حمایت کی ہے۔

صدر مملکت نے پاکستان اور ترکیہ کے درمیان متعدد منصوبوں پر تعاون پراطمینان کا اظہار کیا اور کہا کہ ترکیہ کے ساتھ زراعت، تعلیم، فن وثقافت کے شعبوں میں تعاون کو مزید فروغ دینا ہو گا۔

صدر مملکت نے کہا کہ صدر رجب طیب اردوان پاکستان کے سچے اور مخلص دوست ہیں، ترک صدر نے میرے انتخاب اور رمضان کے آغاز پر ٹیلی فونک کال کی، ترک صدر کا دو مرتبہ ٹیلی فونک رابطہ پاک ترک تعلقات کو وسعت دینے کا اظہار ہے۔

اس موقع پر ترک بری افواج کے کمانڈر نے پاکستان کے ساتھ دفاعی تعاون مزید بہتر بنانے کی خواہش کا اعادہ کیا اور کہا کہ دونوں ممالک علاقائی امن واستحکام کے فروغ میں کردار ادا کر سکتے ہیں۔

صدرمملکت نے ترک لینڈ فورسز کے کمانڈر کو نشان امتیاز ملٹری ملنے پر مبارکباد دی۔

ملاقات میں صدر مملکت آصف علی زرداری نے مزید کہا کہ امید ہے کمانڈر دفاعی تعاون مزید مضبوط بنانے کیلئے کردار ادا کرتے رہیں گے۔