متاثرہ خاتون کو انصاف کی فراہمی ترجیحی بنیادوں پر یقینی بنانے میں کوئی کسر نہیں اٹھا رکھی جائے گی۔آئی جی پنجاب ملزمان کے خلاف دفعہ 354-Aت پ کے تحت مقدمہ درج کیا گیا ہے جس کی سزا عمر قید یا سزائے موت ہے۔ آئی جی پنجاب کی چئیر مین نادرا سے ٹیلی فون پر بات ۔ ملزموںکی شناخت کا عمل فوری شروع کرنے کیلئے کہا۔

لاہور18اگست -انسپکٹر جنرل پولیس پنجاب انعام غنی نے کہا ہے کہ مینار پاکستان، گریٹر اقبال پارک گرائونڈ میں خاتون ٹک ٹاکر اور اسکے ساتھیوں پر تشدد اور دست درازی کرنے والے ملزمان کسی رعائیت کے مستحق نہیں جنہیں سخت سے سخت سزا دلوانے میں کوئی کسر نہیں اٹھا رکھی جائے گی ۔ انہوں نے مزیدکہاکہ خاتون کے ساتھ پیش آنے والا واقعہ انتہائی افسوس ناک ہے اور اسی لیے واقعہ میں ملوث ملزمان کے خلاف دفعہ 354-Aت پ کے تحت مقدمہ درج کیا گیا ہے جس کی سزا عمر قید یا سزائے موت ہے۔انہوں نے مزید کہا کہ واقعہ میں ملوث لوگوں کی تصاویر چیئرمین نادرا کو بھجوا دی گئی ہیںاور نادرا کا عملہ چھٹی کے باوجود ملزموں کی شناخت کے عمل میں مصروف ہے۔انہوں نے مزیدکہاکہ ملزمان کے خلاف تمام ثبوت اور شواہد اکٹھے کر کے انہیں گرفتار کیا جائے گا تا کہ شواہد کی روشنی میں تیار کیے گئے مضبوط چالان کے ذریعے ذمہ داران کو سخت سے سخت سزا دلوائی جائے۔ آئی جی پنجاب نے سی سی پی او لاہوراور ڈی آئی جی انویسٹی گیشن کو مقدمہ کی تفتیش کی خود نگرانی کا حکم دیتے ہوئے تاکید کی ہے کہ متاثرہ خاتون کو انصاف کی فراہمی ترجیحی بنیادوں پر یقینی بنانے میں کوئی کسر نہ اٹھا رکھی جائے اور انصاف کے تقاضے پورے کرتے ہوئے ذمہ داروں کے خلاف بلا امتیاز کارروائی کو یقینی بنایا جائے۔