دورہ پاکستان کی منسوخی پر دباؤ، چیئرمین ای سی بی مستعفی

انگلینڈ کرکٹ ٹیم کے دورہ پاکستان کی منسوخی پر دباؤ کے باعث انگلینڈ اینڈ ویلز کرکٹ بورڈ (ای سی بی) کے چیئرمین آئن واٹمور مستعفی ہوگئے۔

برطانوی میڈیا کا کہنا ہے کہ آئن واٹمور نے مدت پوری ہونے سے قبل ہی عہدے سے استعفیٰ دیا ہے۔

بتایا گیا ہے کہ ان کے عہدے کی مدت پانچ برس تھی جبکہ وہ اس عہدے پر صرف 10 ماہ ہی فائز رہے۔

برطانوی میڈیا کا کہنا تھا کہ انگلینڈ کرکٹ ٹیم کے دورہ پاکستان کی منسوخی کی وجہ سے آئن واٹمور دباؤ کا شکار تھے۔

میڈیا رپورٹس میں یہ بھی کہا کہ آئن واٹمور بورڈ آف ڈائریکٹر کی مشاورت کے بعد عہدے سے مستعفی ہوئے۔

واضح رہے کہ دورہ پاکستان پر آئی نیوزی لینڈ کی کرکٹ ٹیم نے میچ سے چند لمحات قبل دورہ پاکستان کی منسوخی کا اعلان کردیا تھا۔

نیوزی لینڈ کرکٹ بورڈ نے دورے کی منسوخی کی وجہ پاکستان میں سیکیورٹی مسائل بتائے تھے جبکہ بعد میں یہ اطلاعات سامنے آئیں کہ پانچ ملکوں کی ایجنسیوں پر مشتمل سیکیورٹی ایجنسی اتحاد نے اس دورہ سے متعلق تھریٹ جاری کی تھی۔

پانچ ممالک کا سیکیورٹی اتحاد امریکا، کینیڈا، برطانیہ، آسٹریلیا اور نیوزی لینڈ پر مشتمل تھا۔

بعدازاں انگلینڈ نے بھی دورہ پاکستان کی منسوخی کا اعلان کیا تھا جس کے بعد سے انگلش کرکٹ بورڈ اور اس کے چیئرمین آئن واٹمور شدید تنقید کی زد میں تھے۔