عدت پوری کیے بغیر بیوی کی بہن سے شادی غیر قانونی قرار

لاہور ہائی کورٹ نے عدت پوری کیے بغیر بیوی کی بہن سے شادی کو غیر قانونی قرار دے دیا ۔

تفصیلات کے مطابق لاہور ہائیکورٹ نے شہری صابر علی کی درخواست پر تحریری فیصلہ جاری کردیا ہے۔

جسٹس طارق سلیم شیخ نے اپنے فیصلے میں لکھا کہ پہلی بیوی کی عدت کی تکیمل سے پہلے اسکی بہن سے شادی کرنا دو بہنوں کو بیک وقت نکاح میں رکھنے کے مترادف ہے، اسلامی شریعت کے مطابق ایک شخص دو سگی بہنوں کو بیک وقت نکاح میں نہیں رکھ سکتا، پہلی بیوی کی عدت مکمل ہونے سے پہلے اس کی بہن سے شادی فاسد تسلیم کی جائے گی اور یہ قابل سزا جرم ہے۔

فیصلے میں کہا گیا ہے کہ مصور حسین اور اس کی بیوی پر لازم ہے کہ فاسد شادی کے بارے میں معلوم ہوتے ہی جلد سے جلد ایک دوسرے سے علیحدہ ہو جائیں، اگر میاں بیوی ایسی شادی ختم نہیں کرتے تو قاضی کی ذمہ داری ہے کہ ان کی شادی ختم کرے۔

مصور حسین کی جانب سے دائر درخواست میں کہا گیا تھا کہ صابر علی نے پہلی بیوی کو طلاق دینے کے نو دن بعد دوسری بہن سے شادی کی تھی۔