دنیا کا مستقبل کیا ہوگا؟ بل گیٹس نے خطرناک پیش گوئی کردی

بل گیٹس نے کورونا وائرس کی وباء کے حوالے سے ایک نئی پیشگوئی کردی ہے۔

مائیکرو سافٹ کے بانی بل گیٹس نے اپنے ایک بیان میں کہا کہ کورونا کی قسم اومیکرون کی لہر ختم ہونے کے بعد اگلے سال تک کووڈ کے بہت کم کیسز دیکھنے میں آئیں گے اور یہ بیماری سیزنل فلو جیسی ہوجائے گی۔

بل گیٹس نے کہا کہ اومیکرون کی لہر سے دنیا بھر کے ممالک کے طبی نظام کو چیلنج کا سامنا ہے، اس سے بہت زیادہ بیمار ہونے والے زیادہ تر افراد وہ ہیں جن کی ویکسینیشن نہیں ہوئی۔انہوں نے کہا کہ زیادہ متعدی قسم کا امکان تو نہیں مگر اس وباء نے ہمیں کافی حیران کیا ہے، اومیکرون سے لوگوں میں کافی مدافعت پیدا ہوگی کم از کم آئندہ سال تک کے لیے، ہوسکتا ہے کہ کسی وقت ہمیں ہر سال کووڈ ویکسین کا استعمال کرنا پڑے۔

بل گیٹس نے کہا کہ موجودہ ویکسینز سے بیماری کی سنگین شدت اور اموات کی شرح کی روک تھام میں کامیابی ملی ہے مگر اب بھی وہ 2 بنیادی عناصر سے محروم ہیں، ایک تو یہ کہ ان کے استعمال کے بعد بھی بیماری کا سامنا ہوسکتا ہے جبکہ ان کے اثر کا دورانیہ بھی محدود نظر آتا ہے۔ ہمیں ایسی ویکسینز کی ضرورت ہے جو دوباری بیماری کی روک تھام کئی برسوں تک کرسکیں۔

ان کا کہنا تھا کہ اگرچہ اس میں کوئی شبہ نہیں کہ اومیکرون قسم تشویشناک ہے مگر نئی اقسام کو شناخت کرنے، ویکسینز اور اینٹی وائرل ادویات کی تیاری کی رفتار کے باعث انہیں توقع ہے کہ 2022 میں کووڈ ایک اینڈیمک یا مقامی مرض بن کر رہ جائے گا۔

اپنے بیان میں مائیکرو سافٹ کے بانی بل گیٹس نے توقع ظاہر کی کہ مجھے اب بھی یقین ہے کہ اگر ہم درست اقدامات کرتے ہیں تو اومیکرون کی لہر 3 ماہ میں ختم ہوجائے گی۔