پانچ وفاقی وزراء کو اضافی قلمدان تفویض، تین نئے کوآرڈینیٹر مقرر

اسلام آباد: پانچ وفاقی وزراء کو اضافی قلمدان تفویض کردیے گئے ہیں جب کہ وزیر اعظم شہباز شریف نے تین نئے کوآرڈینیٹر بھی مقرر کردیے۔

پانچ وفاقی وزراء کو اضافی قلمدان تفویض کیے گئے ہیں جن میں وزیر نجکاری عبدالعلیم خان کو مواصلات کا اضافی قلمدان دیا گیا جب کہ چوہدری سالک حسین کو مذہبی امور کا اضافی قلمدان دے دیا گیا ہے۔

وزیر صنعت رانا تنویر کو تحفظ خوراک، وزیر منصوبہ بندی احسن اقبال کو بین صوبائی رابطہ اور وزیر پیٹرولیم مصدق ملک کو آبی وسائل کا اضافی قلمدان سونپ دیا گیا ہے۔

دوسری جانب وزیر اعظم شہباز شریف نے تین نئے کوآرڈینیٹر مقرر کردیے ہیں جن میں رانا احسان افضل، رومینہ خورشید عالم اور شبیر احمد عثمانی شامل ہیں۔

رومینہ خورشید عالم کو ماحولیاتی تبدیلی کا کوآرڈینیٹر مقرر کیا گیا ہے جب کہ شبیر احمد عثمانی کو امور کشمیر و گلگت بلتستان کا کوآرڈینیٹر مقرر کیا گیا ہے۔

وزیر اعظم شہباز شریف کی منظوری کے بعد کابینہ ڈویژن نے نوٹیفکیشن جاری کردیا ہے۔